ab chhalakate hue saaGar nahii.n dekhe jaate
Ali Ahmed Jalili

ab chhalakate hue saaGar nahii.n dekhe jaate 
taubaa ke baad ye manzar nahii.n dekhe jaate 

mast karake mujhe auro.n ko lagaa muu.Nh saaqii
ye karam hosh me.n rah kar nahii.n dekhe jaate

saath har ek ko is raah me.n chalanaa hogaa 
ishq me.n rahazan-o-rahabar nahii.n dekhe jaate 

ham ne dekhaa hai zamaane kaa badalanaa lekin
un ke badale hue tevar nahii.n dekhe jaate