mere ham_nafas mere ham_navaa mujhe dost ban ke daGaa na de
Shakeel Badayuni

mere ham_nafas mere ham_navaa mujhe dost ban ke daGaa na de
mai.n huu.N dard-e-ishq se jaa.N_balab mujhe zindagii kii duaa na de

mere daaG-e-dil se hai raushanii usii raushanii se hai zindagii
mujhe Dar hai ai mere chaaraagar ye charaaG tuu hii bujhaa na de

mujhe chho.D de mere haal par teraa kyaa bharosaa hai chaaraagar
ye terii navaazish-e-muKhtasar meraa dard aur ba.Dhaa na de

meraa azm itanaa baland hai ke paraaye sholo.n kaa Dar nahii.n 
mujhe Khauf aatish-e-gul se hai ye kahii.n chaman ko jalaa na de

vo uThe hai.n leke Khum-o-subuu are o 'Shakeel' kahaa.N hai tuu
teraa jaam lene ko bazm me.n ko_ii aur haath ba.Dhaa na de