itanaa to zindagiii me.n kisii kii Khalal pa.De
Kaifi Azmi

itanaa to zindagiii me.n kisii kii Khalal pa.De
ha.Nsane se ho sukuun naa rone se kal paD.e 

jis tarah ha.Ns rahaa huu.N mai.n pii-pii ke ashk-e-Gam
yuu.N duusaraa ha.Nse to kalejaa nikal pa.De

ek tum ke tum ko fikr-e-nasheb-o-faraaz hai
ek ham ke chal pa.De to bahar_haal chal paD.e

[nasheb = descent; faraaz = ascent]

muddat ke baad us ne jo kii lutf kii nigaah
jii Khush to ho gayaa magar aa.Nsuu nikal pa.De

saaqii sabhii ko hai Gam-e-tashnaa_labii magar
mai hai usii ke naam pe jis ke ubal pa.De