dil aur vo bhii TuuTaa huaa dil
Taskeen Qureshi

dil aur vo bhii TuuTaa huaa dil 
ab zindagii hai jiine ke qaabil 

kyaa zindagii kaa ehasaas-e-shaamil 
tere baGair ek Gaarat_garii dil 

hotaa hai jitanaa Khuun-e-tamannaa 
ba.Dhatii hai utanii rangiinii-e-dil 

josh-e-junuu.N me.n yak saa hai dono.n 
kyaa gard-e-saharaa kyaa Khaak-e-manzil 

taqdiir-e-insaa.N aur ye zamaanaa 
ek marG-e-aasaa.N aur vo bhii mushkil 

lab par tabassum aa.Nkho.n me.n aa.Nsuu 
ham likh rahe.n hai.n afsaanaa-e-dil 

'taskeen' se aksar ham bhii mile hai.n 
kuchh bhii ho lekin hai saahib-e-dil