ye ham jo hijr me.n diivaar-o-dar ko dekhate hai.n
Mirza Ghalib

ye ham jo hijr me.n diivaar-o-dar ko dekhate hai.n 
kabhii sabaa ko kabhii naamaabar ko dekhate hai.n 

vo aaye ghar me.n hamaare Khudaa kii qudarat hai 
kabhii ham un ko kabhii apane ghar ko dekhate hai.n 

nazar lage na kahii.n un ke dast-o-baazuu ko 
ye log kyo.n mere zaKhm-e-jigar ko dekhate hai.n 

[dast-o-baazuu=hands and shoulders]