ab ke barasaat kii rut aur bhii bha.Dakiilii hai
Muzaffar Warsi

ab ke barasaat kii rut aur bhii bha.Dakiilii hai
jism se aag nikalatii hai, qabaa giilii hai

sochataa huu.N ke ab a.njaam-e-safar kyaa hogaa
log bhii kaa.Nch ke hai.n, raah bhii pathariilii hai

pahale rag-rag se merii Khuun nicho.Daa us ne
ab ye kahataa hai ke ra.ngat hii merii piilii hai

mujhako be-ra.ng hii na karade kahii.n ra.ng itane
sabz mausam hai, hawaa surKh, fizaa giilii hai