Home | Index of Singers Jagjit_Chitra Page

qaasid ke aate aate Khat ik aur likh rakhuu.N
Mirza Ghalib

qaasid ke aate aate Khat ik aur likh rakhuu.N
mai.n jaanataa huu.N jo vo likhe.nge jawaab me.n

[qaasid=messenger ]

kab se huu.N kyaa bataauu.N jahaa.N-e-Kharaab me.n
shab haaye hijr ko bhii rakhuu.N gar hisaab me.n

[jahaa.N-e-Kharaab=world of problems, shab=night, hijr=separation]

mujh tak kab un kii bazm me.n aataa thaa daur-e-jaam
saaqii ne kuchh milaa na diyaa ho sharaab me.n

[bazm=meeting, saaqii=bar-tender ]

taa phir na intazaar me.n nii.nd aaye umr bhar
aane kaa ahad kar gaye aaye jo Khwaab me.n

[taa=so that, ahad=promise ]

'Ghalib' chuTii sharaab, par ab bhii kabhii kabhii
piitaa huu.N roz-e-abr-o-shab-e-maahataab me.n

[abr=clouds, roz-e-abr=cloudy day, maahataab=moon ]

Available in Album(s):

Home | Index of Singers Jagjit-Chitra Page
Maintained by Nita Awatramani
URL: http://www.ghazalsingers.com
Last updated on: 20th June, 2000